Böyük Britaniya Çində istehsal olunan bəzi məhsulların idxalını məhdudlaşdırır.

Axar.az xəbər verir ki, bu barədə B.Britaniyanın xarici işlər naziri Dominik Raab deyib.

O bildirib ki, məcburi əməkdən dolayı Çinin Sincan Uyğur Muxtar Vilayətində istehsal olunan məhsullar krallığa idxal edilməyəcək:

“Hamı əmin olmalıdır ki, biz regionda insan hüquqları pozuntuları ilə birbaşa və ya dolayı yolla əlaqəli olan məhsulların ixracatını əngəlləmək üçün əlimizdən gələni edirik”.

Xatırladaq ki, Çinin adıçəkilən bölgəsində sayı 20 milyona yaxın olan uyğur əhalisinin xüsusi toplama düşərgələrində zorakılığa, o cümlədən məcburi əməyə məruz qalması ilə bağlı xəbərlər son vaxtlar dünya KİV-ində mütəmadi yayılır. Böyük Britaniya hökuməti Müasir Köləlik Aktı çərçivəsində məcburi əmək vasitəsilə istehsal oluna bilən məhsulların ölkəyə idxalına yol verməmək üçün müvafiq məhdudlaşdırıcı tədbirlər görür.