"Rusiyada böhran hələ pik həddinə çatmayıb. Çünki makroiqtisadi göstəricilərdə baş verən proseslər dalğalı şəkildə davam edir".

Bu barədə Axar.az-a iqtisadçı ekspert Natiq Cəfərli açıqlama verib. O, Rusiya hökumətinin ilin II rübünün sonunda mühüm qərarlar verə biləcəyini istisna etməyib:

"Bu ayın sonu, gələn ayın əvvəllərində bəzi səbəblərə görə neftin qiymətinin xeyli dərəcədə aşağı düşməsi gözlənilir. Rusiya iqtisadiyyatının neftin qiymətindən köklü asılılığını nəzərə alsaq, bunun ölkə iqtisadiyyatında ciddi təlatümlərə yol açacağını proqnozlaşdırmaq olar. Çünki sanksiyalar davam edir və bunun təsirləri ortadadır. II rübün sonu, III rübün əvvəllərində Rusiyadakı böhranın pik həddə çatmasını və iqtisadi artımın xeyli zəifləməsini müşahidə edə bilərik. Bu, istisna deyil. Təbii ki, belə hallar baş verərsə, Putin bunun cavabdehlərini axtarmalı olacaq. Bunun da nəticəsi kimi II rübün sonu, III rübün əvvəllərində istefalar və hökumətdə ciddi dəyişikliklər baş verə bilər. Yəni Putin bu addımı ata və iqtisadi proseslərdən dolayı hökumətin yetərsizliyini irəli sürərək yeni bir kabinet formalaşdırmağa cəhd edə bilər. Bu halda isə keçmişdə Rusiyanın iqtisadi islahatlarında yer almış, liberal qanada yaxınlığı ilə bilinən yeni bir komandanın formalaşması gözlənilən addımlardan biri ola bilər. Bununla da müəyyən dərəcədə islahatların başlamasına ciddi bir siqnal verilmiş olardı".

Qeyd edək ki, Rusiyanın keçmiş maliyyə naziri Aleksey Kudrin Rusiyada iqtisadi böhranın hələ aradan qaldırılmadığını və pik həddin bu ilin ikinci rübündə baş verəcəyini bildirib.