ABŞ Dövlət Departamentinin sözçüsü Maria Harf Yəməndə iqtidarı ələ keçirən şiə üsyançılarla Omanın paytaxtı Maskatda görüşdüklərini təsdiq edib.

Axar.az Bəhreynin "Əl-Vasat" qəzetinə istinadla xəbər verir ki, Harf bu görüşün formal xarakter daşıdığını deyib:

"ABŞ Dövlət Departamenti rəhbərinin Yaxın Şərq üzrə köməkçisi Anna Patterson Oman sultanlığında husilərin nümayəndələri ilə görüşüb. Məqsəd Yəməndə bir-birinə zidd olan tərəfləri Cenevrədə keçiriləcək Yəmən mövzulu sülh konfransında iştirak etməyə razı salmaq olub".

Xatırladaq ki, Maskatda İran və husilərin nümayəndələri ilə Səudiyyə Ərəbistanı və ABŞ heyətləri arasında qeyri-rəsmi müzakirələrin aparıldığı iddia edilmişdi. Müzakirələrin uğurlu olacağı təqdirdə Oman Sülh Təşəbbüsünün elan ediləcəyi bildirilirdi.

Yəmənin rəsmi rəhbərliyi isə Oman müzakirələrinə qatılmadığını açıqlamışdı. Ölkənin qanuni hökuməti istənilən müzakirənin başlaması üçün şərt olaraq şiə üsyançıların silahlı mübarizəyə son verməsini və ələ keçirdikləri bütün torpaqlardan çəkilmələrini tələb etmişdi.