"İslam dövləti"nin işğalında olan Mosul şəhərinin gündəlik həyatı lentə alınıb.

Axar.az xəbər verir ki, BBC əhəmiyyətinə görə İraqın ikinci şəhəri sayılan bu bölgədən reportaj hazırlayıb. BBC-dən Qadi Sarinin əldə etdiyi gizli çəkilişdə məscidlərin partladılması, boşalmış məktəblər və niqab geyməyə məcbur edilən qadınlar göstərilib. Sakinlər daim qorxu içində yaşadıqlarını deyirlər.

Şəhər sakini Hanaa: "Qadın geyiminə dair İD qaydaları çox sərtdir - qadını təpədən dırnağadək qara libas örtməlidir. Bir gün ərimlə şəhərə gəzməyə çıxmaq istədim. Sifəti açıq qoyan paltar geymək istəyəndə, ərim mənə niqab geyməyi tapşırdı. Mən şokda idim, çünki İD şəhəri tutandan sonra evdən bayıra çıxmırdım və şəhərdəki vəziyyətdən xəbərim yox idi".

Onun sözlərinə görə, restorana gediblər: "Həmin restorana müştərilər ailəliklə gəldi. Yerlərimizi tutandan sonra ərim mənə üzümü aça biləcəyimi dedi. Lakin üzümü açanda restoran sahibi dərhal gəlib ərimdən üzümü örtməyim üçün yalvardı. Sahibin sözlərinə görə, İD müfəttişləri qəfildən bura gəlib mənim üzüaçıq olduğumu görsələr, onu qamçılayacaqdılar".

İxtisasca ginekoloq olan Məryəm xristiandır: "Məni hamı kitab dəlisi kimi tanıyır, böyük kitab kolleksiyam var idi. Kitablarımın sayı artırdı, çünki İraqı tərk edən dostlarım bilirdi ki, mənim heç yerə getmək fikrim yoxdur. Mosulun tutulması ərəfəsində sünni ekstremistlər məni hədələyirdilər, lakin din-məzhəbindən asılı olmayaraq, qadın pasiyentlərimin uşaq doğuşunu ayrı-seçkilik olmadan həyata keçirirdim. Mosul tutulandan sonra mən şəhəri tərk etməli oldum. Ərbilə gəldikdən sonra mənə şok xəbər çatdı: İD mənim evimi müsadirə edərək, onu xristian olduğumu anladan "N" hərfilə işarələyib. Mən dərhal Mosuldakı dostlarıma zəng vuraraq onlara kitablarımı xilas etmələri üçün yalvardım. Lakin artıq gec idi".

Zaid: "Ən yüngül cəza qamçılanmadır. Misal üçün, siqaret çəkənləri belə cəzalandırırlar. Oğruların əlini kəsirlər, zina edən kişi hündür binadan yerə atılır, qadın isə ölənədək daşa tutulur. Cəza ictimai yerlərdə icra olunur ki, camaatın gözü qorxsun".

Şəhərdə yanacaq qıtlığının yarandığı, ərazilərin zibilləndiyi, tikinti işlərinin dayandığı, məktəblərin bağlandığı aydın olur.

Hişam: "Həyat inanılmaz dərəcədə dəyişib. Kim ki, orduda qulluq edib və günəmuzd işləyib, onlar pulsuz qalıb, çünki daha iş yoxdur. Varlılar yığdıqlarının hesabına yaşayır, maaşa baxan güclə dolanır, yoxsulların isə ümidi tək Allaha qalıb".