Almaniya iş dünyası Rusiyaya qarşı tətbiq olunan sanksiyalardan narahatdır. Almaniya İqtisadiyyatı Şərq Komitəsi (OA) əlaqələrin tamamilə kəsiləcəyindən ehtiyatlanır.

Axar.az-ın məlumatına görə, Şərqi Avropada fəaliyyət göstərən OA Rusiyaya qarşı sanksiyaların doğura biləcəyi təhlükə barədə xəbərdarlıq edib.

Komitə sədri Ekard Kordes sanksiyaların heç vaxt fayda verməyəcəyini bildirib:

"Bir-biri haqqında deyil, bir-biriylə danışmaq şifrəmiz olmalıdır. Ukrayna böhranı səbəbindən itirilən güvən yenidən qazanılmalıdır".

Rusiyanın G7 ölkələri siyahısından çıxarılmasının səhv addım olduğunu deyən Kordes Rusiyanın bunun əvəzində Çinlə yaxınlaşacağını deyib:

"İqtisadi sanksiyalar və təcridetmə siyasəti mövcud problemləri həll etməyəcək. Bu cür addımlar Rusiyanı yalnız Avropadan uzaqlaşdırıb Çinə yaxınlaşdıracaq. Vladivostokdan Lissabona qədər uzanan ortaq sərbəst ticarət bölgəsinin yaradılması üçün Rusiyanı geri qazanmaq lazımdır".

Xatırladaq ki, Rusiyada təxminən 6 minə yaxın alman şirkəti fəaliyyət göstərir. OA-nın hesabatına görə, həmin şirkətlərdə 300 min Almaniya vətəndaşı çalışır.