"Suriya xalqının Bəşər Əsəd rejiminə qarşı mübarizə apardığını deyirlər. Lakin bu, doğru deyil".

Axar.az xəbər verir ki, bu barədə Rusiyanın "Sputnik" radiosuna müsahibəsində Suriya müftisi Şeyx Əhməd Bədrəddin Hassun deyib. O, Suriyada əsas problemin xarici döyüşçülər olduğunu bildirib:

"Bu gün Suriyada vətəndaş müharibəsinin olduğunu deyə bilmərik. Çünki ölkəmizdə 52 ölkədən terrorçu var. Onların çoxu ABŞ, AB və ərəb ölkələrindən gəlib. Buna görə də Suriya xalqı və ordusu bu gün saysız-hesabsız xarici qüvvələrə və terrorçulara qarşı mübarizə aparır. Bəziləri Suriya xalqının Bəşər Əsəd rejiminə qarşı mübarizə apardığını deyirlər. Lakin bu, doğru deyil. Çünki Bəşər Əsədi Suriya xalqı seçib. Sözlərimin həqiqiliyini yoxlamaq üçün bütün jurnalistləri Suriyaya dəvət edirəm. Gəlin, haqlı olduğumu öz gözlərinizlə görün. Suriya rejimi və xalqı arasında heç bir problem yoxdur. Əsas problem xarici döyüşçülərdir. Bu müharibəni onlar başladıb".