"İslam dövləti"nin sıralarında 5 minədək rusiyalı vuruşur".

Axar.az xəbər verir ki, MDB ölkələri Antiterror Mərkəzinin rəhbəri, general-polkovnik Andrey Novikov bu barədə İnterfax agentliyinə bildirib:

"Hazırda xüsusi xidmətlərin məlumatına görə, İŞİD sıralarında Rusiya pasportuna malik 2 min adam vuruşur. Bəzi ekspert dəyərləndirmələrinə görə isə, onların sayı 5 minə yaxınlaşır".

Ötən il Rusiyanın Milli Antiterror Komitəsi "İslam Dövləti" sıralarına 800-dən 1 minədək rusiyalının daxil olduğunu bildirib.

Mütəxəssislər cihadçı qruplaşmanın sıralarına yeni üzvlərin internet üzərindən cəlb olunduğunu deyirlər. Son bir il ərzində İD-ə Britaniya, Almaniya, Belçika və Fransa kimi ölkələrdən də minlərlə avropalı qatılıb.

"İslam dövləti" ötən il İraq və Suriyada bir neçə böyük şəhəri ələ keçirdikdən sonra məşhurlaşıb. Hazırda hər iki ölkədə xilafət elan etdiyi geniş ərazilərə nəzarət edir. Bu yaxınlarda "cihadçı"lara qatılmaq niyyətində olduğu iddia edilən moskvalı tələbə Mariya Karaulovanın Türkiyə-Suriya sərhədinə getməsi Rusiyada böyük əks-səda doğurmuşdu. Karaulova Moskvaya iyunun 11-də qayıdıb.