Londonda təhlükəsizlik güclərinin səlahiyyətlərinin dəyişdirilməsini nəzərdə tutan qanun layihəsinə qarşı etiraz aksiyası keçirilib.

Axar.az xəbər verir ki, “Qanunu öldür” (Kill the Bill) plakatlarını daşıyan aktivistlər Londonun tarixi Trafalqar meydanından Daxili İşlər Nazirliyinin binasına doğru yürüş ediblər.

Aktivistlər çıxışlarında etiraz hüququnun təhlükə altına düşdüyünü və polisə daha çox səlahiyyət verilməsinə qarşı olduqlarını söyləyiblər.

Mitinq iştirakçılarından 9 nəfər həbs olunub.

Londondakına bənzər nümayişlər Bristol, Şefild, Mançester və Nyukasl şəhərlərində də təşkil edilib.

Qeyd edək ki, ölkədə koronavirus səbəbi ilə toplaşmaq və tədbirlərin keçirilməsi qadağandır.