İran İnqilab Keşikçiləri Donanmasına aid 13 ədəd sürət qayığı Hörmüz boğazında hərəkət edən ABŞ döyüş gəmilərinə 130 metr yaxınlaşmaqla təxribat törədib.

Axar.az xəbər verir ki, bunu Pentaqon sözçüsü Con Kirbi deyib.

O bildirib ki, İran donanması bu hərəkətlə beynəlxalq hüquq normalarına zidd hərəkət edib:

“ABŞ Donanmasına aid döyüş gəmisi tərəfindən havaya 30 dəfə xəbərdarlıq atəşi açıldıqdan sonra İran qayıqları bölgədən uzaqlaşmağa başladı”.

Sözçü qeyd edib ki, bir neçə gün əvvəl ABŞ döyüş gəmisi patrul missiyası sırasında içərisində RPG-lər, Rusiya istehsalı olan tank əleyhinə raketlərlə dolu gəmini ələ keçirib.