ABŞ Hərbi Dəniz Qüvvələrinin "Labun" adlı gəmisi iyunun 28-də Gürcüstanın Batumi limanına yan alıb. Musavat.com-un gürcü qaynaqlarına istinadən verdiyi məlumata görə, qarşılanma mərasimində gəminin kapitanı Kristofer Makkallum gürcü tərəfdaşlarla birgə açıq dənizdə birgə təlimlər keçirəcəklərini bildirib.

Mərasimdə Gürcüstanın müdafiə naziri Tina Xidaşeli də iştirak edib. Onun sözlərinə görə, bu cür gəlişlər ABŞ və Gürcüstan arasında dostluğun dərinləşdiyinin təsdiqi üçün vacibdir. "Amerika tərəfinə təşəkkür edirəm ki, bu cür səfərlər müntəzəm xarakter almaqdadır" – deyib nazir.

"Labun" Virciniya ştatının Norfolk şəhərində mənzillənib. O, ABŞ-ın 6-cı Donanmasının təsir arealında regional dəniz təhlükəsizliyinin möhkəmlənməsi işində çoxfunksiyalı rol oynayır.