Suriyanın Hələb şəhərinin şimalında müxalif qruplar arasında qarşıdurmalar şiddətlənir. Ordu rəsmiləri isə Türkiyənin yaxın vaxtlarda Suriyaya girəcəyini israr edir.

Axar.az xəbər verir ki, Al Baz Briqadalarının komandiri Mahmud Həsən Türkiyənin mümkün müdaxilə ehtimalına qarşı İŞİD-in təhlükəsizlik tədbirləri gördüyünü, nəzarətdə olan kəndlərin ətrafında geniş xəndəklər qazdığını açıqlayıb:

"Terrorçular nəzarətdə saxladıqları bütün kəndlərin ətrafında 4 metr dərinlikdə, 2,5 metr genişlikdə xəndəklər qazırlar. Bu, Türkiyə tərəfdən gələ biləcək hər hansı bir təhlükədən sığortalanmaq üçün edilir. Çünki terrorçular da bilir ki, son günlərdə Türliyənin Suriyaya girəcəyi deyilir".

Xatırladaq ki, Türkiyə sərhədi yaxınlığında müxalif qruplarla İŞİD arasında qarşıdurmalar son günlərdə daha da şiddətlənib. Türkiyənin Kilis vilayətinin 8 kilometrliyində yerləşən Harcele kəndindən hücuma keçən müxaliflər 25 kilometrlik cəbhə boyu terrorçulara qarşı genişmiqyaslı əməliyyatlara start verib.