Malidə minalanmış avtomobilin partlaması nəticəsində Fransa hərbi kontingentinin bir neçə hərbçisi yaralanıb.

Axar.az xəbər verir ki, iyunun 21-də səhər saatlarında Qosi şəhərində yerləşən operativ bazanın yaxınlığında kəşfiyyat missiyası həyata keçirən “Barxan” əməliyyatının qüvvələri silahlıların hücumuna məruz qalıb. Minalanmış avtomobilin partlaması zamanı fransalı hərbçilərlə yanaşı, mülki şəxslər də xəsarət alıb. Yaralıların sayı barədə məlumat verilməsə də, onların Qao hospitalına təxliyə olunması üçün helikopterlərin göndərildiyi bildirilir.

Bir müddət öncə Fransa Prezidenti Emmanuel Makron bildirib ki, Sahel bölgəsindəki hərbi mövcudluq modelini dəyişəcək və “Barxan” əməliyyatı özünün hazırkı formasında sona çatacaq.