Əfqanıstanda baş verənlər genişmiqyaslı humanitar böhrandır. MDB və KTMT ölkələri üzərində terror təhlükəsi artır.

Axar.az xəbər verir ki, bu sözləri Rusiya Dumasının Beynəlxalq əlaqələr komitəsinin sədri Leonid Slutski deyib.

O, Əfqanıstanı artıq 4 milyon insanın tərk etdiyini bildirib:

"Bunların 80%-i qadınlardır. Bu, həqiqətən də ən böyük humanitar böhrandır və qaçqınlarla bağlı vəziyyət təəssüf ki, hər keçən gün daha da pisləşir", - Slutski vurğulayıb.

O qeyd edib ki, Rusiya Prezidenti Vladimir Putinin dediyi kimi, Əfqanıstanın çox hissəsi bir neçə gün ərzində Talibanın hakimiyyəti altına keçdi və bu reallıqla hesablaşmaq lazım gələcək:

"Daha dəqiq ifadə edə bilməzsiniz. ABŞ sayəsində indi bu "reallıq"da milyardlarla dollar dəyərində silahlar var və bütün bunlar sözün əsl mənasında sizin yanınızdadır - MDB və KTMT ölkələrinin", - siyasətçi əlavə edib.