Belarusda terror aktları ilə bağlı aparılan cinayət işi çərçivəsində 20-dən çox şəxs saxlanılıb.

Axar.az xəbər verir ki, bu barədə Belarus Dövlət Təhlükəsizlik Xidmətinin İstintaq İdarəsinin rəhbərinin müavini Konstantin Bıçek deyib.

Onun sözlərinə görə, əməliyyat parlamentin deputatı Oleq Qaydukeviçin evi də daxil olmaqla, paytaxtda bir neçə sosial obyektdə planlaşdırılan hücumlarla əlaqədardır.

Qeyd edək ki, iyulda Qaydukeviç naməlum şəxsin gecə saatlarında onun evinə üç "Molotov kokteyli" atdığını bildirib. Əməliyyat-axtarış tədbirləri zamanı şəhərdə terror hücumu planlaşdıran bir neçə şəxs müəyyənləşdirilərək istintaqa təhvil verilib.