Ermənistan Baş Prokurorluğu 2020-ci ilin payızında Qarabağdakı döyüş fəaliyyətləri ilə bağlı olan 2 min cinayət işi açıb.

Axar.az xəbər verir ki, bu məlumatı “Sputnik Ermənistan” yayıb. Məlumata görə, cinayət işlərində çağırış və hərbi bölmələrin doldurulması zamanı yol verilən mümkün pozuntular, özbaşına xidmət yerini tərk etmə, qanunsuz silah və sursat əldə etmə, onların Qarabağdan Ermənistana gətirilməsi və digər hallar araşdırılır.

Bundan başqa Azərbaycan Ordusunun Ermənistan sərhədinə və Şuşaya hərəkəti, eləcə də ordunun cənub istiqamətində idarəsinin təhqiqatı aparılır. Xüsusilə Cəbrayıl, Hadrut, Daşaltı, Şuşa, Lələtəpədəki döyüş fəaliyyətləri daha çox öyrənilir.

Agentlik təkcə Qarabağın cənubu və Şuşa istiqamətindəki döyüşlərlə bağlı açılan cinayət işində 150 nəfərin adının keçdiyini bildirib. Onlar sırasında separatçıların lideri Araik Arutyunyan, onun müşaviri, separatçı qoşunların rəhbəri, eləcə də “təhlükəsizlik şurasının katibi”nin adlarının yer aldığı vurğulanıb. Əldə edilən sübutlar əsasında 800 nəfərin ittiham olunan şəxs kimi cinayət işlərinə cəlb edildiyi qeyd edilib.