2021.11.29 - 20:20

İranla bağlanmış nüvə sazişini xilas etmək üçün Vyana danışıqları bu gün yenidən başlayır.

Axar.az xəbər verir ki, Avstriya paytaxtının “Koburq” sarayında Avropa İttifaqının sədrliyi altında keçirilməsi nəzərdə tutulan danışıqlarda 2015-ci ildə İranın öz nüvə proqramının dinc məqsədlər üçün istifadə edəcəyinə dair bağlanmış sazişin bərpası və 2018-ci ildə Tramp administrasiyası dövründə sazişi birtərəfli qaydada tərk edən ABŞ-ın yenidən sənədə qoşulması müzakirə ediləcək.

***

Vyana danışıqlarında Tehran razılaşmanın ilkin parametrlərinə qaytarılmasını təklif edən nüvə yolu üzrə işləməyə razılıq verib.

Bunu Rusiyanın Vyana beynəlxalq təşkilatlarındakı daimi nümayəndəliyinin rəhbəri Mixail Ulyanov deyib.

Diplomat qeyd edib ki, Donald Trampın bütün maksimum təzyiq siyasəti qüvvədə qalır, bundan əlavə, vaxtaşırı İrana qarşı əlavə sanksiyalar tətbiq edilir.

"İran ABŞ-la nüvə razılaşmasının bərpası ilə bağlı ABŞ-la birbaşa dialoqa hazır olmadığını bildirib. Amerikalılar razılıq əldə olunarsa, maksimum təzyiq siyasətindən əl çəkməyə hazırdırlar, lakin hələlik onlar köhnə istiqamətə sadiqdirlər", - Ulyanov bildirib.

O etiraf edib ki, danışıqlar Vaşinqtonla Tehran arasında birbaşa təmaslar olmadan uğurla başa çatdırıla bilər.