Kiyev Normand formatındakı işə sadiqdir, lakin biz heç vaxt digər tərəfdaşların və ya dostların təkliflərini və ya təşəbbüslərini geri çevirməmişik.

Axar.az xəbər verir ki, bunu Ukrayna xarici işlər naziri Dmitri Kuleba Türkiyə Prezidenti Rəcəb Tayyib Ərdoğanın Rusiya ilə Ukrayna arasında vasitəçilik etməyə hazır olması ilə bağlı bəyanatı haqda danışarkən deyib.

“Biz bu müharibənin sona çatmasına, hazırda Rusiyanın nəzarəti altında olan Ukrayna ərazisinin geri alınmasına kömək edə biləcək hər cür səyi məmnuniyyətlə qarşılayacağıq. Bu cür tərəfdaşlarla əməkdaşlığa və səylərimizi koordinasiya etməyə hazırıq”, - deyə Kuleba bildirib.

O, Ukraynanın üçtərəfli danışıqlarda yeganə şərtinin Kiyevin iştirakı olmadan heç bir qərarın qəbul edilməməsi olduğunu vurğulayıb:

“Bu, bizim qırmızı xəttimizdir. Qalan hər şeyi məmnuniyyətlə qarşılayırıq. Münaqişəyə son qoymaq üçün istənilən təşəbbüsü danışmağa və məsləhətləşməyə hazırıq”.