Ukrayna Prezidenti Vladimir Zelenski ilə Avropa Birliyi (AB) Şurasının Prezidenti Şarl Mişel arasında telefon danışığı olub.

Axar.az xəbər verir ki, bu barədə Ukrayna Prezidentinin mətbuat xidməti bəyanat yayıb.

Məlumata görə, həmsöhbətlər, həmçinin AB tərəfindən potensial eskalasiyaya qarşı qabaqlayıcı sanksiyalar paketinin hazırlanmasını müzakirə ediblər.

Ukrayna Prezidenti hazırkı vəziyyətdə daxili iqtisadiyyatın sabit inkişafının təmin edilməsinin vacibliyini vurğulayıb. O, bununla bağlı 1,2 milyard avro məbləğində makromaliyyə yardımının ayrılması ilə bağlı vaxtında verilmiş qərara görə Avropa Birliyinə təşəkkür edib.

Liderlər, həmçinin 2022-ci il üçün Ukrayna və Avropa Birliyi arasında gələcək dialoqa dair mövqeləri razılaşdırıblar.

Ukrayna Prezidentinin mətbuat xidmətinin bəyanatında bildirilib ki, yaxın vaxtlarda növbəti, 24-cü Ukrayna-Avropa Birliyi sammitinin tarixi müəyyənləşəcək. Artıq bu ilin ortalarında Avropa Komissiyasının rəhbərliyinin, beynəlxalq tərəfdaşların iştirakı ilə Kiyevdə Avropanın enerji təhlükəsizliyi üçün riskləri birgə müzakirə etmək üçün enerji biznes forumu keçiriləcək.