Tehranda bir araya gələn İran və İspaniya xarici işlər nazirləri Suriya məsələsini müzakirə edib.

Axar.az məlumat verir ki, ispaniyalı nazir Xose manuel Qarsiya-Marqalo Suriya lideri Bəşər Əsədlə danışıqların fayda verəcəyini deyib.

İspaniyanın "El Mundo" qəzetinin xəbərinə görə, Marqalo danışıqların təcili başlanmasının əhəmiyyətinə toxunub:

"Bu günə qədər 250 min adamın ölümünə yol açan bu savaşın daha çox insani faciəyə yol açmasını istəmiriksə, Əsəd rejimiylə müzakirələrə başlamalıyıq. Qərbin Əsədlə danışıqları rədd etməsi ölkədə boşluq yaradır. Bu boşluq da İŞİD tərəfindən istifadə edilir. Terrorçulara qarşı BMT-nin qərarı ilə dəstəklənən mübarizə aparılmalıdır. Xoşumuza gəlsə də, gəlməsə də, Əsəd hökuməti BMT-də təmsil olunur".

Sülhə düşmənlə anlaşaraq nail olmağa inandığını deyən 71 yaşlı diplomat ABŞ-ın sabiq prezidentləri Riçard Nikson və Ronald Reyqanın Çin və Sovet İttifaqı ilə danışıqlarını nümunə gətirib.

Marqalo ilə təşkil etdiyi mətbuat konfransında danışan Tehran xarici siyasət idarəsinin rəhbəri Məhəmməd Cavad Zərif də Əsədin istefasını istəyənləri tənqid edib:

"Suriyanın qonşularından eşitdiyimiz şüarlar sülhə gətirməyəcək. Əsədin gedib-getməyəcəyinə yalnız Suriya xalqı qərar verəcək".