Əgər Rusiya Suriya müharibəsinə tam müdaxilə etsə, o zaman Moskva məğlubiyyətə düçar olacaq.

Axar.az xəbər verir ki, bunu Ukrayna mətbuatına açıqlamasında rusiyalı müxalif siyasətçi Konstantin Borovoy söyləyib. Onun sözlərinə görə, Kreml Suriyada reallaşdıra bilmədiyini Ukraynada həyata keçirməyə çalışacaq:

"Rusiyanın Suriyada uduzmuş əsgərləri oradan çıxarılaraq, Ukraynaya yerləşdiriləcək. Onlar isə öz acıqlarını Ukraynaya tökməyə çalışacaqlar. Əgər Qərbin müdafiə silahları Kiyevin əlində olmasa, o zaman Ukraynanı ağır günlər gözləyir. Qərbin Ukraynaya lazımı silahları verməməsi Donbas savaşının uzanmasına da səbəb olur. Amerikalılar Ukraynada tətbiq etdikləri texnologiyanı Suriyada tətbiq etməyəcəklər. Bu isə müharibənin Rusiya üçün dəhşətli nəticələrlə başa çatmasına səbəb olacaq".