Almaniyada yerləşən tarixi faşist düşərgələri miqrantların ixtiyarına verilib.

Axar.az xəbər verir ki, Buxenvald düşərgəsi Yaxın Şərq və Afrikadan gələn qaçqınlar üçün müvəqqəti sığınacaq olub.

"Deyli Meyl"in məlumatına görə, qaçqınlar artıq 2 aya yaxındır ki, bu düşərgələrdə yaşayır. Qaçqınlara yemək almaq və digər ehtiyaclarını ödəmək üçün isə hər ay 135 avro pul verilir.

Son hesablamalara görə, 4 sentyabrdan bu günə kimi Almaniya 50 min qaçqın qəbul edib. Ümumilikdə yanvar-sentyabr aylarında bu ölkəyə gələn qaçqınların sayı 350 mindən çoxdur.

Xatırladaq ki, faşist Almaniyası dövründə ən böyük düşərgələrindən biri olan Buxenvaldda 1937-1945-ci illərdə təxminən 250 min əsir yaşayıb. Düşərgədə 50-70 min arası əsirin öldürüldüyü təxmin edilir.