Rusiya Xarici İşlər naziri Sergey Lavrov Moskvada BMT-nin Suriya üzrə xüsusi nümayəndəsi Steffan de Mistura ilə görüşüb.

Axar.az xəbər verir ki, görüşdən sonra jurnalistlərə açıqlama verən rusiyalı diplomat Suriya böhranının müzakirəsi üçün radikal qruplaşmaların danışıqlarda iştirak edəcəyini açıqlayıb.

"Ümid edirik ki, danışıqlarda iştirak etmək üçün etdiyimiz dəvəti qəbul edəcəklər. Suriyalı müxaliflər üzərində təsiri olan xarici qüvvələr də danışıqların təşkil edilməsi üçün çalışmalıdır. Beləcə müxalif qruplar yorğanı öz üzərinə çəkməklə vahid mövqe nümayiş etdirə bilərlər", - deyə Lavrov qeyd edib.

Bu arada "Kommersant" qəzeti Moskvanın Suriya danışıqlarında iştirak etməsini istədiyi müxalif qrupları təmsil edən 38 şəxsin adını açıqlayıb.

Qəzetin məlumatına görə, Rusiya hökuməti təkcə Suriyada deyil, xaricdə fəaliyyət göstərən digər təşkilatlarla da danışıqlar aparacaq. Bura Suriya İnqilabçı və Müxalif Qüvvələr Milli Koalisiyasının köhnə və yeni üzvləri də daxil edilib.

Siyahıda Əhməd Carba, Əhməd Xətib, Hadi Bəhra və Bədr Camus kimi koalisiyanın sabiq liderləri yer alıb. Bundan başqa koalisiyanın indiki rəhbəri Xalid Hoca da danışıqlarda iştirak edəcək.

Suriya Milli Koordinasiya Komitəsinin koordinatoru Həsən Əbdulazim və xələfi Heysan Mannanın yer aldığı siyahıda Xristian Demokratik Hərəkatı, Müsəlman Qardaşları və Süryani Birliyinin nümayəndələri də var.

Qəzetin iddialarına görə, Kremldə hazırlanan adlar Səudyyə Ərəbistanının Vyanada təqdim etdiyi siyahı üzərində hazırlanıb və bir-birinə çox bənzəyir.

Xatırladaq ki, Suriya danışıqlarının növbəti raundu Moskvada keçiriləcək.