Gürcüstan hökuməti xalqı aldadıb.

Axar.az xəbər verir ki, bunu Gürcüstan mətbuatına açıqlamasında iqtisadçı Roman Qotsiridze söyləyib. Onun sözlərinə görə, hökumət "Rosneft"ə Poti limanının səhmlərinin 49%-nin satılmasının qanuniliyi ilə bağlı məsələni hələ də tədqiq etməyib:

"Hər kəsə bəllidir ki, "Rosneft" işğal olunmuş ərazilərlə bağlı qanunu pozub. Hökumət "Rosneft" tərəfindən edilmiş bu təhqiri uddu və indi onlara "Qazprom" da gülür. Onlar Gürcüstanla bərabər Cənubi Osetiyaya da qaz verilişi ilə bağlı danışıqlara başlayıblar. Gürcüstan hökuməti Rusiya tələsinə yaxınlaşır. Artıq vizasız gediş-gəliş haqqında söhbətlər yayılmağa başlayıb. Bu isə Moskvanın Tiflis üzərində ən güclü rıçaqlarından biri olacaq".

Qeyd edək ki, Gürcüstan bu ilin əvvəlində Poti limanının səhmlərinin 49%-ni "Rosneft"ə satıb. Bu liman həm Azərbaycan, həm də bölgə üçün kifayət qədər böyük strateji əhəmiyyətə malikdir. Poti limanına yiyələnməzdən əvvəl "Rosneft" Gürcüstanın işğal olunmuş ərazisi olan Abxaziyada da fəaliyyətə başlamışdı.

Hazırda Tiflis Rusiyadan qaz almaq üçün "Qazprom"la gizli danışıqlara start verib.