İran ərəb ölkələrinin daxili işlərinə qarışmaqdan imtina etməlidir.

Axar.az xəbər verir ki, bunu jurnalistlərə açıqlamasında Ərəb Ölkələri Liqasının Baş katibi Nabil əl-Ərəbi söyləyib.

Onun sözlərinə görə, İranın bu addımları beynəlxalq hüquqa ziddir:

"Beynəlxalq münasibətlərdə başqa dövlətlərin daxili işlərinə qarışmamaqla bağlı prinsip var. İran açıq şəkildə bu prinsipi pozur".

Qeyd edək ki, Səudiyyə Ərəbistanı yanvarın 2-də şiə alimi Ayətullah Nimr Baqir ən-Nimr də daxil olmaqla 47 nəfəri edam edib. Bundan sonra Tehrandakı Səudiyyə Ərəbistanı səfirliyi yandırılıb. Səudiyyə buna cavab olaraq İranla diplomatik əlaqələri kəsib.