ABŞ hökumətinin hazırladığı strateji planda Suriya lideri Bəşər Əsədin 2017-ci ilin martına qədər hakimiyyətdə qalacağı göstərilib.

Axar.az xəbər verir ki, bu barədə "Assoşeyted Press" agentliyi məlumat yayıb.

Məlumata görə, ABŞ-ın Suriya ilə bağlı bu planı 2015-ci ilin noyabr ayında Rusiyanın iştirakı ilə keçirilən Vyana müzakirələri zamanı hazırlanıb.

Vyana görüşlərində Suriya hökuməti ilə müxaliflər arasında dialoqun qurulması, 6 ay ərzində keçid hökumətinin yaradılması və 2017-ci ilin avqustunda isə seçkilərin keçirilməsi nəzərdə tutulurdu. Lakin yeni plana əsasən, ABŞ hökuməti Əsədin postunda qalmasına razı oldu.

Plana görə, Əsəd hökuməti ilə müxalifətdən olan nümayəndələr müzakirələrdən sonra bu ilin aprel ayında Təhlükəsizlik Komitəsi yaradacaq. May ayında isə parlament ləğv ediləcək. BMT Təhlükəsizlik Şurası yeni keçid hökumətini tanıyacaq.

Tərəflərin birgə hazırladığı konstitusiya isə 2017-ci ilin yanvar ayında referenduma qoyulacaq. 2017-cı ilin mart ayında isə Əsəd və tərəfdarları hakimiyyətdən gedəcək.

O da bildirilib ki, Rusiya və İran seçkilərdən 6 ay əvvəl Əsədin hakimiyyətdən getməsini qəbul etməyəcək. ABŞ-ın müttəfiqləri Türkiyə, Səudiyyə Ərəbistanı və Qətər bunu xəyanət olaraq dəyərləndirəcək.