Türkmənistan Prezidenti Qurbanqulu Berdiməhəmmədov Rusiya Prezidenti Vladimir Putini ölkəsinə səfərə dəvət edib.

Axar.az xəbər verir ki, bunu Rusiya Xarici İşlər naziri Sergey Lavrovla görüşdən sonra Türkmənistan lideri söyləyib.

Qeyd edək ki, Lavrov bu gün Türkmənistana səfər edib. Rusiya mətbuatı səfər zamanı Lavrovun Türkmənistan lideri ilə türkmən qazının Rusiya ərazisindən Avropa Birliyinə daşınması məsələsini də müzakirə edəcəyini bildirib. Lavrovun səfəri ərəfəsində həmçinin açıqlama yayan Rusiya Xarici İşlər Nazirliyinin rəsmi nümayəndəsi Mariya Zaxarova Aşqabadı Mosvanın strateji tərəfdaşı adlandırıb.

Türkmənistan məhz Xəzərin statusunun tam müəyyən olunmaması ucbatından Azərbaycanla birgə Transxəzər layihəsini həyata keçirə bilmir. Həm İran, həm də Rusiya bu layihəyə qarşı çıxır. Moskva bundan öncə dəfələrlə məhz bu layihənin reallaşdırılmasına imkan verməyəcəyi ilə bağlı üstüörtülü açıqlamalar yayıb.