Suriyanın Hələb şəhərində yerləşən məktəbimiz Rusiya təyyarələri tərəfindən bombalandı. Lakin bu hücumlar məktəbimizin fəaliyyətini dayandırmayacaq. Əksinə, azad Suriya uğrunda daha qətiyyətlə mübarizə aparacağıq.

Axar.az xəbər verir ki, bu sözləri Türkiyənin Suriyadakı Yardımlaşma və Həmrəylik Dərnəyinin sədri Mustafa Çaylı deyib.

O bildirib ki, məktəbə hücumlar həftə sonuna təsadüf etdiyindən hər hansı ölüm faktı qeydə alınmayıb:

"Hələb şəhərinin Keferqan bölgəsində yerləşən məktəbə ciddi ziyan dəyib. Rusiya İŞİD-ə qarşı mübarizə bəhanəsiylə Suriyadakı türkmanları, o cümlədən mülki əhalini bombalayır. Bu hücumlar suriyalıların gələcəyini məhv etməyəcək. Bizə qarşı aparılan ədalətsiz mübarizə dərnəyimizin fəaliyyətinə əngəl yarada bilməyəcək. Əksinə, bundan sonra daha qətiyyətlə fəaliyyətimizə davam edəcəyik".

Qeyd edək ki, Türkiyə hökuməti suriyalı uşaqların təhsil alması üçün bu ölkədə bir sıra dərnəklər yaradıb.