2016-cı il ərzində qeyri-OPEK ölkələrində gündəlik hasilat 700 min barrel azalacaq.

Axar.az xəbər verir ki, bu, OPEK-in digər neft istehsalçıları ilə bağlı proqnozunda öz əksini tapıb.

"Beynəlxalq neft şirkətlərinin xərclərində ixtisar etməsi, ABŞ və Kanadadakı aktiv qazma quyularının sayının azalması və köhnə quyulardakı kəskin enişlər qeyri-OPEK ölkələrdə hasilatın azaldığını göstərir", - təşkilat bildirib.

OPEK-ə gəldikdə isə təşkilat ötən ay hasilatı 131 min barrel artıraraq, gündəlik 32,34 milyon barrelə çatdırıb.

Qeyd edək ki, 2014-cü ilin iyulundan başlayaraq dünya bazarlarında neftin qiyməti ucuzlaşıb. Qiymətlərin düşməsində başlıca səbəb kimi hasilatın çoxluğu, təklifin tələbi üstələməsi göstərilir.

Qeyri-OPEK ölkələrində hasilatın azaldılmasının qiymətlərin nisbətən bahalaşacağına səbəb olacağı ehtimal edilir.