Rusiya və ABŞ arasında Suriyada atəşkəsin təmin edilməsi ilə bağlı əldə olunan razılaşma müharibənin sona çatdırılması üçün ilk addımdır.

Axar.az xəbər verir ki, bu sözləri Rusiyanın paytaxtı Moskvada səfərdə olan Suriya Prezidenti Bəşər Əsədin müşaviri Buseyna Şaban deyib.

"Ən son istədiyim müharibənin davam etməsidir. Hökumət müharibənin sona çatmasını istəyir. Rusiya və ABŞ arasındakı razılıq bu yolda atılan ilk addımdır. Terrorçuların nəzarətində olan əraziləri müəyyənləşdirmək çox çətindir", - Şaban vurğulayıb.

Buseyna Şaban onu da qeyd edib ki, ABŞ Dövlət katibi Con Kerrinin açıqladığı "B planı"ndan xəbərdar deyil və yeganə istədikləri axan qanın dayandırılmasıdır.

Xatırladaq ki, ABŞ Dövlət katibi Con Kerri açıqlamasında Suriyada atəşkəsin təmin edilməyəcəyi halda, ölkənin bölünməsini özündə ehtiva edən "B planı"nın işə düşəcəyini bildirmişdi.