Yunanıstan dövlət televiziyasına hücum olub.

Axar.az-ın verdiyi xəbərə görə, ERT telekanalının 50 illiyində anarxist Ruvikonas qrupu canlı yayımda efirə basqın edib.

Hücum zamanı operator xəsarət alıb. Efirə hücum edənlərdən 22 nəfər saxlanılıb, üç nəfər isə axtarışdadır.

Xəbərlər proqramının aparıcısı Panos Haritos və yunan kommunist millət vəkili Lianna Kanelli canlı yayımda baş verən hadisədən şoka düşüblər.

Ardınca ekran qaralıb və köhnə yayıma keçirilib. Sonra sabitlik bərpa olunub və veriliş davam etdirilib. Aparıcı hər zaman canlı yayımda spontan hadisələrin baş verdiyini diqqətə çatdırıb.

Anarxist qruplaşmanın məqsədi siyasi tələblərini canlı yayımda səsləndirmək olub. Millət vəkili onların bəyanatını özü oxuyacağını təklif etsə də, razılaşmayıblar.

Bu hadisədən sonra etirazçıların qətnaməsi internetdə yayımlanıb. Bəyanatda mövcud hakimiyyətin iqtisadi böhrana son qoymaq əvəzinə, kəmərsıxma siyasətini davam etdirməsi tənqid olunub.

Millət vəkilinin sözlərinə görə, etiraz şiddətlə olmamalıdır: "Mən dedim ki, bəyanatı verin, oxuyum, amma istəmədilər. Əfsus ki, bir operator pis yaralandı, bəzi telefonlar qırıldı"