ABŞ hökumətinin neft hasilatının səviyyəsinə müdaxilə etmək hüququ yoxdur və buna cəhd də etməyəcək.

Axar.az xəbər verir ki, bunu jurnalistlərə ABŞ-ın Energetika naziri Ernest Moniz deyib.

O, OPEK Baş katibi Abdulla Səlim Bədrinin hasilatın dondurulması barədə dialoq çağırışına cavab verib:

"Biz hökumətik. Biz neft istehsalçılarımızın hasilat həcminə nəzarət etmirik".

Qeyd edək ki, OPEK baş katibi fevralın 22-də neft hasilatının dondurulması barədə ABŞ-ı danışıqlara çağırıb.

Fevralın 16-da Səudiyyə Ərəbistanı, Rusiya, Venesuela və Qətər neft hasilatını 11 yanvar 2016-cı il səviyyəsində saxlamaq barədə razılaşıb. Venesuelanın Neft naziri Euloxio Pino Ekvador, Əlcəzair, Nigeriya, Oman və Küveytin bu qərarı dəstəklədiyini açıqlayıb. İran isə hasilatı dondurub-dondurmayacağını açıqlamadan sazişi dəstəklədiyini bildirib.

Birjalarda neftin qiyməti 2014-cü ilin iyulundan ucuzlaşmağa başlayıb. Ucuzlaşmanın başlıca səbəbi kimi isə hasilatın çoxluğu göstərilir.