Rusiya Ukraynaya qoşunlarını Donbasdan çıxarmağı və vəziyyəti bu yolla həll etməyi təklif edib, lakin bu təşəbbüs rədd edilib.

Axar.az xəbər verir ki, bu barədə Rusiya Prezidenti Vladimir Putin deyib.

“2022-ci ilin fevral-mart aylarında qoşunlarımız Kiyevə yaxınlaşdı. Bu mövzuda çoxlu spekulyasiyalar var. Birləşmələrimiz əslində Kiyev yaxınlığında yerləşirdi. Sonrakı fəaliyyət üçün müxtəlif təkliflər var idi. Ancaq üç milyonluq şəhərə hücum etmək üçün heç bir siyasi qərar yox idi. Bu, Ukrayna rejimini sülhə məcbur etmək əməliyyatı idi. Hərbçilər Ukrayna tərəfini danışıqlara sövq etmək üçün orada idilər”, - o bildirib.

Putinin sözlərinə görə, Moskva Rusiya Federasiyasına Krıma quru dəhlizi təqdim ediləcəyi halda Kiyevin Xerson və Zaporojye vilayətləri üzərində suverenliyini qoruyub saxlamağı istisna etməyib:

“Xerson və Zaporojyenin sakinləri Rusiya Federasiyasına qoşulmaq barədə öz mövqelərini bildiriblər, bu məsələ artıq əbədi olaraq bağlıdır. Yeni ərazilər əbədi olaraq Rusiya Federasiyasınındır, bu məsələ hətta müzakirə edilə bilməz”.