Rusiya Hava Desant Qüvvələrinin komandanı Vladimir Şamanov öz vəzifəsindən istefaya gedə bilər.

Axar.az xəbər verir ki, bu barədə informasiyanı "Kommersant" qəzeti yayıb. Şamanovun tezliklə Dumada deputat olacağı gözlənilir. Güman olunur ki, Şamanov Dumada Müdafiə Komitəsinə rəhbərlik edəcək.

Rusiya Hava Desant Qüvvələrinin Mətbuat Xidməti yayılan informasiyaları təkzib edib.

Qeyd edək ki, Şamanov 2009-cu ildən etibarən Rusiya Hava Desant Qüvvələrinə rəhbərlik edir. O həmçinin Krım və Suriya əməliyyatlarına görə cavabdehlik daşıyan əsas generallardan hesab olunur.

Şamanov 1990-1994-cü illərdə SSRİ-nin 328-ci hərbi desant alayına rəhbərlik edib. Bu alay 1993-cü ildə Gəncədən çıxarılıb. Şamanov həmçinin Dağlıq Qarabağ savaşında Azərbaycanın tərəfində vuruşub. Qeyri-rəsmi məlumata görə isə o, 1992-ci ildə Azərbaycan ordusunun həyata keçirdiyi Goranboy əməliyyatında iştirak edib.

Qarabağdan sonra general hər iki Çeçenistan və 1999-cu ildə baş tutan Dağıstan əməliyyatlarında da iştirak edib. Şamanov 2008-ci ilin avqustunda baş tutan Gürcüstan müharibəsinin də əsas iştirakçılardan biri hesab edilir. Abxaziyadan Gürcüstan ordusunun çıxarılmasını nəzərdə tutan Kodor dərəsi əməliyyatı məhz onun rəhbərliyi altında keçirilib. Bu əməliyyatdan bir il sonra isə Şamanov Rusiya Hava Desant Qüvvələrinə rəhbər gətirilib.