Son illər Azərbaycanın Qarabağ bölgəsində baş verən hadisələrə görə günahı Ermənistan rəhbərliyi daşıyır.

Axar.az xəbər verir ki, bu sözləri Belarus Prezidenti Aleksandr Lukaşenko ölkədə yaşayan müxtəlif millətlərin nümayəndələri ilə görüşündə deyib.

“Qarabağda baş verənlər isə təkcə Ermənistan rəhbərliyinin günahıdır, mən şəxsən onlara (Ermənistan hakimiyyətinə - red.) xəbərdarlıq etmişəm: əraziləri onlara (Azərbaycana – red.) ver. Üstəlik, onlar (Ermənistan – red.) etiraf ediblər: "Bu bizim ərazilər deyil. Bəli, bu, bizim ərazilər deyil, Azərbaycanındır. Lakin biz verməyəcəyik, döyüşəcəyik”, – o vurğulayıb.

Belarus lideri qeyd edib ki, o, İrəvanla Bakı arasında problemin sülh yolu ilə həllinə çağırıb:

“Sonra Putindən xahiş etdim. Biz artıq ikimiz Paşinyandan istəməyə başladıq: “Problemi həll et”.

Onun sözlərinə görə, Ermənistanın Baş naziri Nikol Paşinyan buna belə cavab verib: “Xeyr, döyüşəcəyik”.

“Döyüşdülər. Sonra Rusiya və bizdən inciməyin anlamı nədir? Axı sən özün Qarabağın Azərbaycan ərazisi olduğunu etiraf etdin. Kimdən inciyirsən? Kim səni belə danışmağa məcbur edir? Görünür, Qərbə, Avropa Birliyinə istəyir”, – dövlət başçısı bildirib.