Rusiya ordusu bir-iki il də Ukraynaya qarşı hərbi əməliyyatlar apara biləcək.

Axar.az xəbər verir ki, bunu Ukrayna Silahlı Qüvvələri Baş Qərargah rəisinin keçmiş müavini, general-leytenant İqor Romanenko bildirib.

"Vəziyyət və onun perspektivləri ilə bağlı müxtəlif qiymətləndirmələr var. Qərb və Ukrayna ekspertləri hazırda Rusiyanın müharibə vəziyyətini və potensialını, xüsusən də iqtisadiyyat və hərbi sənaye kompleksini nəzərə alaraq qiymətləndirmə aparırlar. Rusiya bu vəziyyətdə daha iki il müharibə apara bilər", - İ.Romanenko vurğulayıb.

Onun sözlərinə görə, cəbhədəki döyüş əməliyyatlarının intensivliyi Ukraynanın müttəfiqlərinin silah, texnika və döyüş sursatlarının tədarükünə necə kömək edəcəyindən asılı olacaq.