Rusiyaya məxsus döyüş təyyarələri Baltik dənizində ABŞ-ın "USS Donald Kuk" gəmisi üzərində bir neçə dəfə alçaqdan uçuş edib.

Axar.az xəbər verir ki, bu barədə ABŞ Müdafiə Nazirliyindən məlumat verilib.

Xəbərə görə, təhlükəli manevr iki gün davam edib:

"11 apreldə Baltik dənizində Kalininqraddan 70 dəniz mili uzaqlıqda, beynəlxalq sularda ABŞ və Polşa arasında ikitərəfli hərbi əlaqələri inkişaf çərçivəsində Polşanın Qdınya şəhərinə gedən "USS Donald Kuk" adlı ABŞ gəmisi təhlükəli manevrlərlə qarşılaşıb. Rusiyanın SU-24 qırıcı təyyarələri gəmidən 100 fit (təxminən 30 metr) yüksəklikdə 20 dəfə alçaq uçuş edib. Bundan başqa, 12 apreldə Rusiyanın KA27 vertolyotu gəmi üzərində bir neçə dəqiqə dayanaraq fotoşəkillər çəkib. Daha sonra iki SU-24 döyüş təyyarəsi 11 dəfə gəmi üzərində açıq uçuş keçirib".

Rusiya tərəfi hadisə ilə bağlı şərh verməyib.