Neft istehsal edən ölkələr razılaşmasa belə, qiymətlər yenə də yüksələ bilər.

Axar.az xəbər verir ki, bu barədə ABŞ-ın "Siti" bankının analitikləri bildirib.

Analitiklərin fikrincə, istehsalçı ölkələrdən Venesuela, Nigeriya və Əlcəzair siyasi qeyri-sabitlik və sosial iğtişaşlar nəticəsində hasilatın həcmini azaltmaq məcburiyyətində qalacaq. Bu isə ilin 2-cü rübündə neft qiymətlərinin 39, 3-cü rübdə 46, 4-cü rübdə 52 dollara qədər yüksəlməsinə gətirib çıxaracaq.

Bankın analitikləri qeyd edir ki, iki illik (2014-2016. – red.) artım tempindən sonra hasilat azalmağa doğru gedəcək və 2017-ci ildə qiymətlər 60 dollara qədər yüksələcək.

Qeyd edək ki, 18 istehsalçı ölkə ötən gün Dohada keçirilən görüşdə hasilatın dondurulması barədə razılığa gələ bilməyib.