ABŞ hökuməti 5, 10 və 20 dollarlıq əsginazları qadın hüquqları və demokratik dəyərlərə görə yenidən hazırlayacaq.

Axar.az xəbər verir ki, ölkənin Maliyyə Nazirliyinin yaydığı məlumata görə, yeni 20 dollarlıq əsginazların üzərində köləlik əleyhinə mübarizə aparmış Afrika əsilli amerikalı Harrit Tubmanın şəkli olacaq. Beləliklə, ABŞ dollarında ilk dəfə qaradərili qadının portretindən istifadə ediləcək.

Əsginazın arxasında isə ABŞ-ın 7-ci prezidenti Endrü Cekson və Ağ Ev-in təsviri yer alacaq.

10 dollara gəlincə, əsginazın üzündə ABŞ-ın ilk Maliyyə naziri Aleksandr Hemiltonun şəkli, arxasında 1913-cü ildə qadınlara səsvermə haqqı verilməsi üçün keçirilən yürüşü əks etdirən təsvirdən istifadə olunacaq.

5 dollarlıq əsginazlarda isə 1960-cı illərdə Vaşinqtondakı Linkoln abidəsi önündə demokratik dəyərlər üçün aparılan mübarizəni əks etdirən rəsm yer alacaq.

Yeni əsginazların 2020-ci ilə qədər hazırlanması planlaşdırılır.