Qondarma Abxaziya müxalifəti təcili referendum keçirilməsi üçün 19.314 imza toplayıb.

Axar.az xəbər verir ki, toplanan imzalar "Mərkəzi Seçki Komissiyası"na təqdim edilib. Müxalifət referendumda ölkədə vaxtından əvvəl prezident seçkisi keçirilməsini səsverməyə çıxarmaq istəyir. Onlar hazırkı "prezident" Raul Xadjimbanın üzərinə götürdüyü öhdəliklərin heç birini yerinə yetirmədiyini bildirirlər.

Qeyd edək ki, Xadjimba 2014-cü ildə qondarma qurumun lideri seçilib. Dövlət Təhlükəsizlik Komitəsinin keçmiş əməkdaşı olan Xadjimba millətçi siyasəti ilə seçilir. O, Gürcüstan və gürcülərə qarşı sərt siyasət yürüdür. Xadjimba həmçinin Abxaziyanın Rusiyaya birləşdirilməsinin əleyhdarı kimi tanınır. Məhz onun dövründə Moskva qondarma rejimlə hərbi müttəfiqlik haqqında müqavilə imzalayıb.

Abxaziya Gürcüstan ərazisidir. Bu ərazi 90-cı illərin əvvəllərində Rusiyanın separatçılara verdiyi dəstəkdən sonra Tiflisin nəzarətindən çıxıb.