2024.11.30 - 22:32

Tiflisdə hökumət əleyhinə keçirilən aksiyanın iştirakçıları parlament binasının şüşələrini daşla sındırıblar.

Axar.az xəbər verir ki, bu barədə Gürcüstan Daxili İşlər Nazirliyi məlumat yayıb.

“Mitinq başlayandan dərhal sonra aksiya iştirakçılarının bəzilərinin hərəkətləri zorakılığa çevrilib, xüsusən də etirazçılar daş və digər əşyalarla qanunverici orqanın binasının onlarla pəncərə şüşəsini qırıblar”, - məlumatda deyilir.

Nazirlik bildirib ki, bəzi mitinq iştirakçılarında pirotexniki vasitələr, daşlar və müxtəlif ağır əşyalar olub.

“Bir daha aksiyanın hər bir iştirakçısını öz etirazlarını qanuni, dinc formada bildirməyə və qanunsuz hərəkətlərə əl atmamağa çağırırıq”, - deyə DİN əlavə edib.

Bu arada, parlament binasını qorumaq üçün əraziyə xüsusi təyinatlılar yeridilib.

***

Aksiyaçılar parlament binası önündə barrikadalar qurublar.

Nümayişçilər dəmir laylar qoyaraq, onu yaxınlıqdakı səkilərdən qoparılan dəmir skamyalarla möhkəmləndiriblər. Onların sözlərinə görə, bu yolla xüsusi təyinatlılara və su şırnaqlarına müqavimət göstərmək istəyirlər. Hələlik polislə toqquşma olmayıb.

Qeyd edək ki, aksiyalar 28 noyabrda Baş nazir İrakli Kobaxidzenin AB-yə üzvlük danışıqlarının 2028-ci ilə qədər dayandırıldığını elan etməsindən sonra başlayıb. 3 gündür davam edən aksiyalarda polislə toqquşmalar olub, onlarla etirazçı saxlanılıb.

Aksiyalara Prezident Zurabişvili də ciddi dəstək verir.

***

Etirazçılar Gürcüstan parlamentinin binasında yanğın törədiblər.

***

Tiflisdə polis parlament binasının ətrafındakı etirazçılara müdaxilə etməyə başlayıb.

Xüsusi təyinatlı polis dəstələri parlament binasının girişlərini tutmağa çalışan etirazçıları ərazidən çıxarmağa başlayıb.