Suriyadakı vəziyyətlə bağlı proqnoz vermək hələ də çətindir, çünki bir neçə mümkün ssenari var.

Axar.az xəbər verir ki, bunu “İzvestiya”ya rusiyalı politoloq və şərqşünas Andrey Ontikov deyib.

“Birincisi, Suriyanın Liviya nümunəsi ilə xaosa sürüklənməsidir. Bu ssenariyə İdlibdə vaxtaşırı baş verənlərin məntiqi səbəb olur. Müxtəlif terrorçu və müxalif qruplar arasında toqquşmalar və döyüşlər başlayıb. Liviyada çoxlu xarici oyunçu var və buna baxmayaraq, 2011-ci ildən bəri vəziyyət daim gərgin və təlatümlü olaraq qalır. Xüsusilə də Tripolinin özündə vaxtaşırı döyüşlər gedir”, - o bildirib.

Politoloqun fikrincə, ikinci ssenari Suriyanın dağılmasını istisna etmir və ya ölkənin formal birliyini nəzərə alsaq, o, təsir zonalarına bölünəcək:

“Çox güman ki, israillilər işğal etdikləri Qolan təpələri yaxınlığında hansısa sanitar zona yaratmaq bəhanəsi ilə işğal zonalarını genişləndirəcək. Bu iki ssenarinin birləşməsi də mümkündür”.