Ermənistanın Baş naziri Nikol Paşinyan Polşa Prezidenti Andjey Dudanı və həyat yoldaşını noyabr ayında üçgünlük rəsmi səfəri çərçivəsində qəbul edib. Səfər zamanı Duda Paşinyana xüsusi hədiyyə təqdim edib.

Axar.az xəbər verir ki, məlumatı “Joxovurd” paylaşıb.

Nəşrin yazdığına görə, Polşa prezidentinin Paşinyana verdiyi hədiyyə 925 əyarlı gümüşdən hazırlanmış, qiymətli daşlarla - baltik gümüşü və oniks ilə bəzədilmiş üç cüt qol düyməsi olub. Düymələrin ümumi dəyəri 74 577 dram (təxminən 190 dollar) təşkil edir.

Bildirilib ki, ölkə qanunlarına görə, Ermənistanın ictimai vəzifəli şəxsləri, o cümlədən baş nazir xarici qonaqlardan aldıqları hədiyyələri müvafiq reyestrdə qeydiyyatdan keçirməlidir. Əgər hədiyyənin dəyəri 40 min dramı keçərsə, o, rəsmi şəkildə qeydiyyata alınmalıdır, 60 min dramı keçdikdə isə dövlətin və ya icmanın mülkiyyətinə çevrilir və məmurlar onu dövlətə təhvil verməlidirlər. Hədiyyənin dəyəri 60 min dramı keçdiyi üçün Paşinyan onu özündə saxlaya bilməyəcək.