ABŞ-ın Gürcüstanda keçirdiyi hərbi təlim NATO-nun Rusiyanın Qərb və Cənub hərbi dairələrində yeni diviziyalar yaradacağı ilə bağlı açıqlamasına cavabdır.

Axar.az xəbər verir ki, bunu Gürcüstan mətbuatına müsahibəsində hərbi ekspert Vaxtanq Maisaya söyləyib. Onun sözlərinə görə, NATO və Rusiya arasında başlayan soyuq müharibənin sərhədləri Gürcüstandan keçir:

"Novorosiysk və Krasnodarda yerləşən 7-ci desant divizasiyası hərbi əməliyyatlar zamanı Gürcüstana qarşı hücum üçün istifadə ediləcək. Üstəlik, Rusiya 8-ci diviziyasını Krım yarımadasında yerləşdirib. Bu isə Ukraynaya doğru istiqamətlənəcək. Rusiyanın Qərb Hərbi Dairəsində yaradacağı diviziya Baltikyanı və Polşaya istiqamətlənəcək. Gürcüstan və Ukrayna artıq NATO və Rusiyanın qarşıdurması nəticəsində yaranan yeni münaqişə ocaqlarıdır".

Qeyd edək ki, ABŞ-ın Gürcüstanda hərbi təlimi mayın 11-də başlayacaq. Moskva artıq buna etiraz edərək, Vaşinqtonun Qafqazda stabilliyi pozduğunu bildirib.