ABŞ-ın yeni seçilmiş Prezidenti Donald Tramp Ukraynanın yenidən qurulması xərclərini Rusiyaya ödədə bilər.

Axar.az xəbər verir ki, bu barədə Huver İnstitutunun baş elmi işçisi Nil Fergüson və Tafts Universitetinin professoru Kris Miller “Voll Strit Jurnal”dakı məqalələrində bildirib.

“ABŞ vergi ödəyiciləri üçün daha az xərclə Avropanı təhlükəsiz saxlamağın açarı Avropa bank hesablarında ola bilər. Qərb Rusiyanın 300 milyard dollara yaxın valyuta aktivlərini dondurdu, lakin Avropanın inadkarlığı bu vəsaitlərin Ukraynaya müharibənin vurduğu ziyanı kompensasiya etmək üçün istifadə olunmasına mane oldu. Yeni seçilmiş Prezident Tramp Ukraynanın yenidən qurulmasını və gələcək silah alışlarını maliyyələşdirmək üçün Kremlin ehtiyatlarını səfərbər etməkdə israr etməlidir”, - müəlliflər qeyd edib.

Dünya Bankının məlumatına görə, Rusiya Ukraynaya 150 milyard dollardan çox birbaşa ziyan vurub və 500 milyard dollara yaxın iqtisadi itki verib.

Miller və Fergüsona görə, həll yolu dondurulmuş Rusiya aktivlərindən istifadə etməkdir:

“Tramp administrasiyasının daha yaxşı razılaşma əldə etmək üçün unikal imkanları var. Putinin pullarının onun təcavüzünün qurbanlarına verilməsindən Atlantik okeanının hər iki tərəfi faydalanacaq, nə qədər tez, bir o qədər yaxşıdır”.