Amerikanın qızıl dövrü indi başlayır.

Axar.az xəbər verir ki, bunu ABŞ-ın 47-ci Prezidenti Donald Tramp yanvarın 20-də keçirilən inauqurasiya mərasimində deyib.

"Bu gündən ölkəmiz çiçəklənəcək və yenidən bütün dünyada hörmət qazanacaq. Bütün dövlətlər bizə həsəd aparacaq, öz maraqları üçün bizdən istifadə etmələrinə imkan verməyəcəyik. Elə edəcəyik ki, Amerika həmişə birinci yerdə olacaq.

Suverenliyimiz geri qaytarılacaq, təhlükəsizliyimiz bərpa olunacaq, ədalət yenidən bərqərar olacaq və Ədliyyə Nazirliyinin siyasi istismarına son qoyulacaq. Milli uğurun yeni erasına başlayırıq, ölkəmizə böyük bir dəyişiklik dalğası gəlir və bu, bütün dünyanı bürüyəcək.

Amerika tarixdə heç vaxt olmadığı qədər bu imkanlardan istifadə edəcək. Ancaq əvvəlcə qarşımızda duran problemləri təhlil etməliyik. Onlar çoxdur, lakin öhdəsindən gələ bilərik, bu da bizə qürurlu adımızı ABŞ-a qaytarmağa imkan verəcək.

Ölkəmizdə böhranın öhdəsindən gələ bilməyən bir hökumətimiz var idi. Xaricdə baş vermiş bir sıra fəlakətli hadisələri də qeyd edə bilərik", – o bildirib.