Şimali Koreya əsgərlərinin Rusiyanın Kursk vilayətində cəbhə xəttindən tam şəkildə çıxarılmasından danışmaq hələ tezdir.

Axar.az xəbər verir ki, bunu Şimali Koreya üzrə alman mütəxəssis Frederik Şpor deyib.

"Qoşunların çıxarılması ilə bağlı yekun qərar vermək hələ tezdir. Ancaq bir şey aydındır: Kim öz ölkəsi daxilində təzyiqlə üzləşməmək üçün çox itkiyə yol verə bilməz", - o bildirib.

Mütəxəssis vurğulayıb ki, itkilər həddindən artıq olarsa, gələcəkdə Şimali Koreyanın lideri Kim Çen İn Rusiyaya yalnız silah verməklə kifayətlənər:

"Lakin problem ondadır ki, heç kim KXDR əhalisinə başqa ölkəyə qoşun yeritmək barədə heç nə deməyib. Şimali Koreyanın dövlət mediası əsgərlərinin Rusiyada müharibədə olması barədə məlumat yaymayıb. İndi rejimin qarşısında çətin bir sual durur: həlak olanlar barədə xalqa və ailələrinə necə izah vermək olar? Ölkə daxilində istənilən qeyri-sabitlik Kim üçün son dərəcə arzuolunmazdır".