Türkiyəyə “Meteor” raketlərinin satışının qarşısını almaq üçün Fransa Prezidenti Emmanuel Makronla Parisdə görüşən Yunanıstan Baş naziri Kiriakos Miçotakis rədd cavabı alıb.

Axar.az xəbər verir ki, bu barədə Yunanıstanın EFSYN nəşri məlumat yayıb.

Məlumata görə, Fransa tərəfi Miçotakisə bildirib ki, bu, beynəlxalq praktika baxımdan mümkün deyil, çünki “Meteor” altı ölkənin iştirakından ibarət konsorsium tərəfindən istehsal edilib.

Bildirlib ki, Fransadan rədd cavabı alan Yunanıstan konsorsiumda yer alan ölkələrə də müraciət edəcək.

Qeyd edək ki, hava-hava tipli “Meteor” raketi Fransanın MBDA şirkəti tərəfindən istehsal olunur. Raketin istehsalı ilə bağlı konsorsiumda Fransadan başqa Britaniya, Almaniya, İtaliya, İsveç və İspaniya da yer alır.

2021-ci ildən Afina hər biri "Meteor" raketləri ilə təchiz olunmuş 24 ədəd "Rafale" döyüş təyyarəsi alıb. Buna baxmayaraq, bu raketləri Ankaranın əldə etməsinə mane olmağa çalışır.