Bir az əvvəl Donald Trampla danışdım. Uzun bir söhbət oldu. Sülhə nail olmaq imkanları haqqında danışdıq. Komandalar səviyyəsində birgə işləməyə hazır olduğumuz barədə fikir mübadiləsi apardıq. Texnoloji imkanlarımız, xüsusən də dronlar və digər müasir istehsalatlar haqqında söhbətimiz oldu. Prezident Trampa birgə edə biləcəyimiz işlərə göstərdiyi marağa görə minnətdaram.

Axar.az xəbər verir ki, bu sözləri Ukrayna Prezidenti Vladimir Zelenski ABŞ Prezidenti Donald Trampla danışığının detalları haqqında danışarkən deyib.

O, həmçinin Trampla ABŞ-ın maliyyə naziri Skott Bessentlə olan söhbətini müzakirə etdiyini bildirib.

ABŞ prezidenti isə öz növbəsində Putinlə olan söhbətinin detalları barədə onu məlumatlandırıb. Zelenski vurğulayıb ki, Ukrayna sülhü ən çox istəyən tərəfdir.

"Amerika ilə birgə Rusiya təcavüzünü dayandırmaq və etibarlı, uzunmüddətli sülhü təmin etmək üçün atacağımız addımları müəyyən edirik. Prezident Trampın dediyi kimi: “Let's get it done” (Gəlin, bunu həyata keçirək)", - deyə dövlət başçısı yazıb.

Qeyd edək ki, Tramp bu gün Rusiya lideri Vladimir Putin və Ukrayna Prezidenti Vladimir Zelenski ilə telefon danışığı aparıb.