Rusiyanın başlatdığı müharibə nəticəsində Ukraynanın ərazilərini itirməsi sülh sazişində qeyd oluna bilər. Lakin bu, ərazi itkilərinin rəsmi tanınması demək olmayacaq.

Axar.az xəbər verir ki, bunu ABŞ Prezidenti Donaıd Trampın Ukrayna və Rusiya üzrə xüsusi nümayəndəsi Keyt Kelloq bildirib.

“Onlar 2014-cü il sərhədlərinə, Rusiya Krıma girməzdən əvvəl sahib olduqları sərhədlərə qayıtmayacaqlar. Hesab edirəm ki, ərazilərin potensial itirilməsi ilə bağlı müəyyən razılaşma olacaq. Ancaq bunu tanımaq lazım deyil - biz bunu Baltikyanı ölkələrlə etməmişik”, - Kelloq vurğulayıb.

Kelloq xatırladıb ki, SSRİ Baltikyanı ölkələrin ərazilərini işğal edəndə ABŞ heç vaxt Sovet İttifaqının onlara sahib olduğunu deməyib. Söhbət ondan gedirdi ki, onlar sadəcə olaraq SSRİ-nin hökmranlığı altında idilər.