Tramp ABŞ-ın Rusiyadakı hazırkı səfiri Linn Treysini diplomatik xidmətdən azad etməyi planlaşdırır, Rusiya nümayəndələri Ər-Riyadda danışıqlar zamanı ondan Dövlət katibi Marko Rubioya şikayət edib.

Axar.az xəbər verir ki, bu barədə Rusiya Teleqram kanalları məlumat yayıb.

“ABŞ prezidenti 2023-cü ildən Moskvadakı diplomatik missiyaya rəhbərlik edən Treysi ilə bağlı müvafiq sərt qərar verəcək. O, artıq Treysinin Rusiyaya strateji məğlubiyyət vermək zərurəti haqqında tezisləri irəli sürdüyü barədə məlumat alıb”, - xəbərdə qeyd olunub.

Bildirilib ki, Səudiyyə Ərəbistanında 18 fevralda aparılan danışıqlar zamanı Rusiya nümayəndə heyətinin üzvləri Treysinin fəaliyyətini tənqid edən materialları ABŞ Dövlət katibi Rubioya veriblər və səfiri radikal demokratların himayədarı, Trampa nifrət edən və Ukrayna tərəfdarı adlandırıblar.

Rusiyadakı yeni səfirin ABŞ-ın Liviya, Gürcüstan və Özbəkistanda səfiri işləmiş Riçard Norland olacağı gözlənilir.